Тэухьидымрэ иманымрэ зыхэлъхэм яхуэфащэр

Тэухьидымрэ иманымрэ зыхэлъхэм яхуэфащэр

[ شركسي – Circassian – Адыгэбзэ]

Мухьэммэд аль-Тууейджри

Ибрахим и къуэ

—™

Зэзыдзэк1ар ик1и бзэ лъэныкъуэк1э еплъыжар:

Аматуллах Шэркэси

Шэрихьэт лъэныкъуэк1э еплъыжар:

Абу Мухьэммэд Шэркэси

جزاء

أهل التوحيد والإيمان

محمد بن إبراهيم التويجري

—™

ترجمة وتدقيق لغوي:

أمة الله الشركسي

مراجعة شرعية:

أبو محمد الشركسي

Тэухьидымрэ иманымрэ

зыхэлъхэм яхуэфащэр

- Тэухьидымрэ иманымрэ зыхэлъхэр Алыхьым тыгъэ лъап1эхэк1э мы дунейм къигъэгугъащ, ахэм ящыщу нэхъ лъап1э дыдэхэр: ехъул1эныгъэ, тек1уэныгъэ, лъэк1ыныгъэ щ1ым деж къаритащ, къащхьэщожыр ахэм, шынагъуэм щехъумэ, къырегъэл, бэрэчэтыр къарет, джаурхэр къатригъак1уэкъым, Алыхьыр ящ1ыгъущ хэхауэ, ф1ыуэ елъагъухэр.

Ахърэтым къигъэгугъахэщ ф1ыгъуэу щы1эхэмк1э, мылъкушхуэк1э, нэм имылъэгъуауэ, тхьэк1умэм зэхимыхауэ, ц1ыхум и гум къэмык1ауэ: «Псэм ищ1экъым къыхуэгъэхьэзырар нэхъ ф1эф1ым щыщу, ящ1ам щхьэк1э яхуэфащэу». (Ас-сэдждэ: 17).

Нэхъ лъап1эу тэухьидымрэ иманымрэ зыхэлъхэм къаритахэм мы дунейми ахърэтми щыщ:

Япэрауэ, Щы1эныгъэ дахэ мы дунейми ахърэтми.

Алыхьым жи1ащ: «Ц1ыхухъуи ц1ыхубзуи ф1ы зыщ1ар ик1и ар му1минмэ щы1эныгъэ дахэк1э дгъэпсэунущ, я псапэри яттынущ нэхъыф1у ящ1ахэм папщ1э». (Ан-Нэхьл: 97).

Ет1уанэу, жэнэтым ихьэнущ.

Алыхьым жи1ащ: «Алыхьым иман зи1э хъуахэу ф1ы зыщ1ахэр жэнэт псы къыздыщ1эжхэм иришэнущ, Алыхьым зыхуейр ещ1э». (Аль-Хьэдж: 14).

Ещанэу, жэнэтым и ф1ыгъуэхэм зэпымычу хэтынущ.

Алыхьым жи1ащ: «Иман зи1эу 1уэхуф1 зыщ1ахэр гъэгуф1э ахэм щхьэк1э жэнэт псы къызщ1эжхэр зэрахуэфащэмк1э, абым щыщу шхын къыратмэ жа1эр: «Мыр ипэм къыдатауэ щыта», ауэ къыхуахьар ещхьу аращ. Абыхэм щхьэгъусэ къабзэхэр я1эщ абдежым, сыт щыгъуи щы1энухэщ абдеж». (Аль-Бэкъэрэ: 25).

Епл1анэу, тхьэр яхуэаразыщ.

Алыхьым жи1ащ: «Алыхьым му1минхэмрэ му1минэтхэмрэ игъэгугъащ жэнэт псыхэр къызщ1эжым сытым щыгъуи зэпымычу щы1эну, унэ дэгъуэхэмк1э жэнэтым, ауэ Алыхьым и аразыныгъэр нэхъ инщ. Аращ ехъул1эныгъэ нэхъ лъап1эр». (Ат-Тэубэ: 72).

Етхуанэу, Алыхьышхуэу Лъап1эу Лъагэр жэнэтым ялъэгъунущ.

Алыхьым жи1ащ: «Нэгухэр а махуэм нэжэгужэщ, я тхьэм еплъхэу». (Аль-Къиямэ: 22-23).

Еханэу, Алыхь Лъап1эу лъагэм пэгъунэгъухэщ.

Алыхьым жи1ащ: «Ф1эщхъуныгъэ быдэ зи1эхэр жэнэтхэмрэ псыхэмрэ хэтщ, щ1ып1э пэжым псори зыхузэф1эк1 Унэфэщ1ым деж». (Аль-Къэмэр: 54-55).

Ебланэу, Тхьэ Лъап1эу Лъагэм и псалъэхэр зэхахынущ.

Алыхьым жи1ащ: «Жэнэтым щы1эхэр а махуэм гуф1эгъуэ куэдым хэтщ, езыхэри я щхьэгъусэхэри жьауэхэм п1э щабэхэм зытрагъащ1э, ахэм папщ1э пхъэщхьэмыщхьэхэмрэ зыхуейуэ хъуамрэ щы1эщ. «Сэлям» псалъэр къажре1э я Тхьэ Гущ1эгъушхуэ зи1эм». (Ясин: 55-58).

Еянэу, маф1эм къелынущ.

Алыхьым жи1ащ: «Псори фыщхьэщык1ынущ абым, аращ уи Тхьэм унафэу къихьар. Ит1анэ тхьэшынагъуэ зыхэлъхэр къедгъэлынущи залымыгъэ зыщ1ахэр лъэгуажэмыщхьэу къэдгъэнэнущ». (Мэрям: 71-72).

- Дунейм дыкъызэригъэгугъахэр иджыпсту мысылмэн куэдым я гъащ1эм щы1экъым, абым къик1ыр я иманыр зэрыкъарууншэращ, ик1и унэсыфынукъым абым иманыр нэхъ быдэ умыщ1ауэ зэрыщытын хуейм хуэдэу. Алыхьым дыкъызэригъэгугъахэр къытлъысыным папщ1э ди иманымрэ ди 1уэхуф1хэмрэ бегъымбархэмрэ сэхьабэхэмрэ я иманымрэ 1уэхуф1хэмрэ нэдгъэсын хуейщ ипэжып1эк1э.

1 – Алыхьым жи1ащ: «Фэ ф1эщхъуныгъэу фи1эм хуэдэу езыхэми я ф1эщхъуныгъэр щытмэ гъуэгу занщ1эм теувахэщ. Ауэ абым тек1амэ, къуэншагъэм хэхуахэщ. Алыхьым абыхэм уащихъумэнщ, ар Ас-Сэмигь, Аль-Гьэлим». (Аль-Бэкъэрэ: 137).

2 – Алыхьым жи1ащ ит1ани: «Уэ ф1эщхъуныгъэ зи1эхэ, Алыхьымрэ, и л1ык1уэмрэ, тхылъыу и лык1уэм къыхуригъэхамрэ, тхылъыу ипэк1э къыригъэхамрэ фи ф1эщ фыщ1. Алыхьымрэ, и мэлэ1ичхэмрэ, и тхылъхэмрэ, и л1ык1уэхэмрэ, къемэт махуэмрэ зи ф1эщ мыхъур щыуащ щыуэныгъэ жыжьэ дыдэк1э». (Ан-Нисаl: 136).

3 – Алыхьым иджыри жи1ащ: «Уэ ф1эщхъуныгъэ зи1эхэ, диныр зэрыпсоуэ къафщтэ, шейт1аным и гъуэгухэм фытемыхьэ, ар фи бий нахуэщ». (Аль-Бэкъэрэ: 208).