<ul></ul><div class="rtl start"><p class="ltr center" id="p1"><span dir="rtl">نېمە ئۈچۈن بىز تەقدىرىمىزدە پۈتۈلگەن نەرسىلەرگە ھېساب بېرىمىز؟</span></p><p class="rtl center" id="p2">لماذا نحاسب على ما كتب علينا</p><p class="rtl center" id="p3">&lt; الأويغورية - ئۇيغۇرچە - <span dir="ltr">uyghur</span> &gt;</p><p class="ltr center" id="p4"><span dir="rtl">پەزىلەتلىك شەيخ </span><span dir="rtl">ۋەلىد ئال-فەريان</span></p><p class="ltr center" id="p5"><span dir="rtl">فضيلة الشيخ وليد الفريان</span></p><p class="ltr center" id="p6">—™</p><p class="rtl center" id="p7">تەرجىمە قىلغۇچى: سەيپىددىن ئەبۇ ئابدۇلئەزىز</p><p class="rtl center" id="p8">تەكشۈرۈپ بېكىتكۈچى: نىزامىددىن تەمكىنى</p><p class="rtl center" id="p9">ترجمة: سيف الدين أبو عبد العزيز</p><p class="rtl center" id="p10">مراجعة: نظام الدين تمكيني</p><p class="ltr center" id="p11"><span dir="rtl">نېمە ئۈچۈن بىز تەقدىرىمىزدە پۈتۈلگەن نەرسىلەرگە ھېساب بېرىمىز؟</span></p><p class="rtl justify" id="p12">11126-نومۇرلۇق سوئال</p><p class="rtl justify" id="p13">سوئال:</p><p class="rtl justify" id="p14">ئىنساننىڭ ئاقىۋىتى ئىلگىرى ئاللاھ تائالانىڭ ھوزۇرىدا پۈتۈلگەن بويىچە بولىدىغان بولسا، بىر ئىنساننىڭ تەقدىرىدە ئۇ مەلۇم بىر كىشىنى ئۆلتۈرىدىغانلىقى بېكىتىلگەن بولسا، بۇ ئىشنىڭ يۈز بېرىشىنى چەكلەش قانداق مۇمكىن بولىدۇ؟، ئۇ كىشى مەزكۇر خاتالىقنىڭ يۈز بېرىشىنى چەكلەشكە قادىر بولالمايدىغان تۇرسا، نېمە ئۈچۈن ئۇ خاتالىققا ئاساسەن جازاغا ئۇچرايدۇ؟، بۇ توغرىدا چۈشەنچە بېرىشىڭلارنى سورايمەن.</p><p class="rtl justify" id="p15">جاۋاپ:</p><p class="rtl justify" id="p16">بارلىق گۈزەل مەدھىيىلەر ئالەملەرنىڭ پەرۋەردىگارى بولغان ئاللاھ تائالاغا خاستۇر.</p><p class="rtl justify" id="p17">ئاللاھ تائالا ئۆز قۇدرىتى بىلەن ئىشلارنى تەقدىر قىلدى، ئاللاھ تائالا ئىرادە قىلغان تەقدىرگە ئىشىنىش ئىماننىڭ ئاساسلىرىدىن بىرىدۇر. چۈنكى ئاللاھ تائالا بارلىق مەخلۇقاتلارنى ياراتقۇچى بولۇپ، ئۆزىنىڭ چەكسىز ئىلمىدە ئۇلارنىڭ يارىتىلغاندىن كىيىن نېمە ئىشلارنى قىلىدىغانلىقىنى ياخشى بىلىدۇ. ئاللاھ تائالا شۇنىڭ ئۈچۈن بەندىگە ئىختىيارلىقنى بىرىپ، ئۇنىڭغا ياخشىلىق يوللىرىنى كۆرسىتىپ بەردى. كىمكى توغرا ئىش قىلسا ئۆزىنىڭ پايدىسى ئۈچۈن،<span class="c6"> خاتا ئىش قىلسا ئۆزىنىڭ زىيىنى ئۈچۈن قىلىدىغانلىقى توغرىسىدا ئاللاھ تائالا مۇنداق دەيدۇ:</span> ﴿فَمَن يَعْمَلْ مِثْقَالَ ذَرَّةٍ خَيْرًا يَرَهُ.<span class="c6"> وَمَن يَعْمَلْ مِثْقَالَ ذَرَّةٍ شَرًّا يَرَهُ﴾ تەرجىمىسى:</span> كىمكى زەررىچىلىك ياخشى ئىش قىلىدىكەن، ئۇنىڭ مۇكاپاتىنى كۆرىدۇ. كىمكى زەررىچىلىك يامان ئىش قىلىدىكەن، ئۇنىڭ جازاسىنى تارتىدۇ.» <span class="c5">[سۈرە زەلزەلە 7-8-ئايەت]</span>.</p><p class="rtl justify" id="p18">ئاللاھ تائالا يەنە مۇنداق دەيدۇ: ﴿وَنَفْسٍ وَمَا سَوَّاهَا، فَأَلْهَمَهَا فُجُورَهَا وَتَقْوَاهَا، قَدْ أَفْلَحَ مَن زَكَّاهَا،<span class="c6"> وَقَدْ خَابَ مَن دَسَّاهَا﴾ تەرجىمىسى:</span> «روھ بىلەن ۋە ئۇنى چىرايلىق قىلىپ ياراتقان، ئۇنىڭغا ياخشى - يامانلىقنى بىلدۈرگەن زات بىلەن قەسەمكى، روھىنى پاك قىلغان ئادەم چوقۇم مۇرادىغا يېتىدۇ، نەپسىنى <span class="c2">(كۇفرى ۋە پىسقى - فۇجۇر بىلەن)</span> كەمسىتكەن ئادەم چوقۇم نائۈمىد بولىدۇ.» <span class="c5">[سۈرە شەمس 7-10-ئايەتكىچە]</span>.</p><p class="rtl justify" id="p19">شۇنىڭ ئۈچۈن بىر كىشىنى ئۆلتۈرۈش بولسۇن ياكى باشقا يوللار ئارقىلىق ھەقسىز ئازار يەتكۈزۈش ھارامدۇر. كىمكى شۇنداق قىلىدىكەن، دۇنيادىمۇ تىگىشلىك جازاسىنى تارتىدۇ، ئاخىرەتتە ئاللاھ تائالانىڭ شەرئىي قانۇنىغا خىلاپلىق قىلغانلىقى ئۈچۈن قاتتىق ئازابقا دۇچار بولىدۇ. ئاللاھ ھەممىدىن ياخشى بىلگۈچىدۇر.</p><span class="rtl start"></span></div>