حوكمی ڕۆژووی ئافرهتهی شیردهر

] kurdish – كوردی – كردي [

دهستهی بهشی زمانی كوردی له ماڵپهڕی ئیسلام هاوس

پێداچونهوهی: پشتیوان سابیر عهزیز

2012 - 1433

حكم صيام المرضع

« باللغة الكردية »

فريق قسم اللغة الكردية بموقع دار الإسلام

مراجعة: بشتيوان صابر عزيز

2012 - 1433

حوكمی ڕۆژووی ئافرهتهی شیردهر

پرسیار : من ئافرهتێكم و مناڵ به بهرم و شیر دهدهم به مناڵهكهم، ئایا دهكرێت ڕۆژوو نهگرم، وه ئهگهر ڕێگای پێدراوه له ئیسلامدا دواتر چیم لهسهر واجب دهبێت ؟ خوای گهوره پاداشتی خێرتان بداتهوه .

وهڵام : سوپاس بۆ خوای گهوره ومیهرهبان، وه درود و صهڵات وسهلام لهسهر محمد المصطفی وئال وبهیت ویار ویاوهرانی ههتا ههتایه .

ئافرهتی سك پر، و شیردهر، حاڵیان لهسێ حاڵهت بهدهر نییه :

حاڵهتی یهكهم : ئهگهر هاتوو ترسیان ههبوو لهسهر گیانی خۆیان و مناڵهكانیان، ئهو كاته ڕۆژووهكانیان ناگرن و پاشتر قهزای دهكهنهوه، بهڵگهش لهسهر ئهمه، پێغهمبهر ( صلی الله علیه وسلم) فهرموویهتی : « إن الله وضع عن المسافر شطر الصلاة والصوم، وعن الحبلى والمرضع الصوم » [رواه أبو داود في الصيام باب في الصوم في السفر (2408) ،وصححه الألباني في صحيح سنن أبي داود برقم (2083)] .

واتا : خوای گهوره نیوهی نوێژی لهسهر موسافیر ههڵگرتووه (بهوهی نوێژه چوار ڕكاتیهكان لهسهفهردا دهكات به دوو ڕكات) وه خوای گهوره ڕۆژوو لهسهر موسافیر ههڵگرتووه تا ئهو كاتهی لهسهفهردایه، ههروهها ڕۆژووی له سهر ئافرهتی سك پڕ و شیردهر ههڵگرتووه .

حاڵهتی دووهم : ئهگهر هاتوو تهنها ترسیان لهسهر گیانی مناڵهكهیان ههبوو، ئهو كاته لهسهر ڕای دروستی زانایان لهگهڵ گرتنهوهی ڕۆژووهكهشدا دهبێت كهفارهتیش بدهن بۆ ههر ڕۆژێك خواردنی ههژارێك .

حاڵهتی سێههم : ئهگهر هاتوو تهنها ترسیان لهسهر گیانی خۆیان ههبوو، ئهوكاته تهنها ڕۆژووهكانیان دهگرنهوه، و هیچ كهفارهت نادهن [ الممتع شرح زاد المستنقع: (6/360- 361) ] .

خوای گهوره زاناتره .