Lɩslaoongã Tẽn-tʋʋmã a Mʋhammad, -Wẽnd pʋʋsg la A tɩlgr be a yĩnga

Ne Wẽnd Yʋʋrã Albarka, sẽn ya a Dũni gũbg n yols Naabã, n yɑ ɑ yɑoolem rɑɑr welg n yols Naabã.

Lɩslaoongã Tẽn-tʋʋmã a Mʋhammad, -Wẽnd pʋʋsg la A tɩlgr be a yĩnga

Yaa yõngr bilfu, sẽn kẽed lɩslaoongã Tẽn-tʋʋmã a Mʋhammado-Wẽnd pʋʋsg la A tɩlgr be a yĩnga- yelle, tɩ m vẽnegd a pʋgẽ n wiligd a yʋʋrã, la a buudã, la a tẽngã, la a furã, la a tẽn-tʋmdã, la a sẽn bool n tʋg bũmb ningã, la a nabiyaamdmã tagmas-rãmbã, la a Šari wã, la a zabd-n-taasã na-kẽndr ne-a.

1- A yʋʋrã, la a buudã, la tẽng ningɑ a sẽn roge la a bɩ a pʋgẽ wã.

Lɩslaoongã Tẽn-tʋʋmã, yẽ la a Mʋhammad, sẽn yaa a Abdʋllaah biiga, sẽn yaa a Abdʋl Muṭalib biiga, sẽn yaa a Haašim biiga, b yii a ɭsmaa'ɩɩl yagensẽ wã sẽn yaa a ɭbraahɩɩm biigã, tɩlgr be b yĩnga; La rẽnda, yaa tɩ Wẽnd Nabiyaama a ɭbraahɩɩma, tɩlgr be a yĩnga, a yii Šaam n wa Maka, t'a paga a Haaǧar rag n be ne-a, ne a biiga a ɭsmaa'ɩɩl, la mikame t'a na n be nugẽ. La a zĩndga b yiibã Maka, ne sagell sẽn yi Wẽnd nengẽ, A Naam yɩ wagell n zẽke, la biigã sẽn wa n bɩ wã, nabiyaamã a ɭbraahɩɩm waa Maka, tɩlgr be a yĩnga, n me Kaabã sẽn yɑɑ Lohorm Doogã, yẽ ne a biiga a ɭsmaa'ɩɩl, tɩlgr be b yiibã yĩnga, tɩ nebã wʋsg Roogã kɩremse, tɩ Mak lebg toglg zĩiga ne Wẽnd tũudbã sẽn yaa bõn-naands Naabã, sẽn nong b n maan Hiǧiimdã, la nebã kell n kẽngɑ ne Wẽnd tũudmã la A yembgã, n be a ɭbraahɩɩm sorã zugu tɩlgr be ne-ɑ, yʋʋm kobs pʋgẽ, Rẽ poorẽ tɩ gõdgr wa kẽ, tɩ Laarãb-rãmbã zamaanã tẽmsã halhaalã lebg wala tẽms tɑɑbɑ sẽn be ɑ kɩrensã , sẽn yɑɑ dũni wã tẽms fãa gilli, kɩfẽndã yεlã n wil ɑ pʋgẽ: wala rʋbsã tũubu, la koam-pugli busb vɩɩse, la pagb wẽgbo, la zĩri-beed goam, la rãam yũubu, la yel-beed maanego, la kɩɩbs arzεgs rɩɩbo, la rɩbaag reegre... Zĩ-kãngã, la yalε-kãngã pʋga, la lɩslaoongã Tẽn-tʋʋm rogyã ɑ Mʋhɑmmɑd sẽn ya a Abdʋllaah biiga, sẽn yi a ɭsmaa'ɩɩl yagensẽ wã a ɭbraahɩɩm biigã, tɩlgr be b yĩnga, yʋʋm 572, a Yisa rogmã loogr poorẽ, a saambã maana kaalem taoor t'a na n ka rog ye, t'a ma wã maan kaalem a yʋʋm a yoob wakato, t'a saam-bila a Abʋʋ Ṭaalɩb wub-a, rẽnd a vɩɩmame n yaa kɩɩba, n yaa talga, la a rag n yɩɩme n rɩtẽ la a bɑood pɑɑngo ne ɑ nug tʋʋmɑ.

2-Albark furã loese ne albark pagã

La a yʋʋmã sẽn wa n yaa pisi la a nu wã, a fura paga, sẽn yaa Mak pagbɑ yembre, a ẖadiiǧa, sẽn yaa a ẖʋwaylɩd bi-puglã, Wẽnd yard be a yĩnga, la Wẽnd lok-a la a nengẽ koam-pugli a naase la koam-ribli a yiibu, la a koam-ribli wã maana kaalem b yãadrã wakato, la a tʋmd-n-taarã ne a pagã la a zakã rãmbã rag n yɩɩme n yaa bʋgsg wʋsgo la noanglem, rẽ n kɩt t'a paga a ẖadiiǧa bʋ-a noanglem sẽn yaa wʋsgo, yẽ me yɩ a la noamglem, la a ka yĩm a pagã yelle, halɩ n tʋg n tãag a kaalemã poorẽ yʋʋm woko. La a ra yɩɩme n kodgd pesg n pʋɩt a ẖadiiǧa zao-rãmba, Wẽnd yard be b yĩnga, n waoogd-ba, tɩ yaa mangr ne ɑ pagã, n leb n yɑɑ gũusg ne noaglem ning sẽn da be bãmb sʋka.

Wahɩ wã (tʋmsgã) sɩngre

Tẽn-tʋʋm a Mohammad, Wẽnd pʋʋsg la A tɩlgr be a yĩnga, ra yɩɩm n da be zʋgd sẽn yɑɑ zɩsg zugu Wẽnd sẽn naan-a wã tεka, la nebã rag n boond-a lame tɩ Aṣṣaadɩƙ Al-amiin (sɩd-soab sẽn yɑɑ bas-m-yam soaba), la a rag n yɩɩme n lagemd-ba tʋʋm sõmbsã pʋgẽ, la a kisgd bũmb ning bãmb sẽn be a zugã, sẽn yaa kɩfẽnd tʋʋmã, a ka lagemd-b a pʋgẽ ye.

Lɑ ɑ sẽn wa n ta yʋʋm pis naase -mikame t'a rag n bee Maka- la Wẽnd na n tũus-a t'a na n yɩ Tẽn-tʋʋma, tɩ Malεk a Gibriil tɩlgr be a yĩnga waa a nengẽ, ne sʋʋra ning sẽn yaa pipi n sig Alkʋrãan pʋgẽ wã zugu , yẽ me la Wẽnd koεεg sẽn yeele, A Naam zẽkyã: (Karem ne f Soab ning sẽn naana wã yʋʋre.(1) A naana ninsaalɑ sẽn sɩng ne zɩ-pelle (2) Karem, tɩ fo Soabã n yɩɩd ne kũuni.(3) Sẽn wilg-a kaal-moogã gʋlsgo (4) A wilga ninsaala bũmb ninga a sẽn dɑ pa mi. (5) [Al-Alaƙ 1-5], T'a wa a paga a ẖadiiǧa nengẽ, Wẽnd yard be a yĩnga, t'a sũurã rigda, n togs-a kibarã, t'a kẽes-ɑ yĩn-yõgngo, la a tall-a n kẽng ne a sãmbɩbã biig nengẽ, a Warɑƙat sẽn yaa a Nawfal biigã -la yẽ rag n yɩɩme n kẽ Nasaar-rãmbã dĩinẽ, n karem Tawraatã la Lingiilã, t'a ẖadiiǧa yeel-a: " m sãmbɩb biigɑ! Kelg f saam-biigã biig koεεga". T'a Warɑƙat yεεl-a: " m saam-biig biiga! Yaa bõe la fo ne?" Tɩ Wẽnd Tẽn-tʋʋma, -Wẽnd pʋʋsg la A tɩlgr be a yĩnga- togs-a a sẽn yã bũmb ningã kibare, t'a Warɑƙat yeel-a: (Yã wã la Naab no-rees ning sẽn sig a Muusã wã, kato, m sã n da paamẽ n ket n vɩ wakat ning fo nebã sẽn wat n nɑ n yiis foomã, tɩ Wẽnd Tẽn-tʋʋma, Wẽnd pʋʋsg la A tɩlgr be a yĩnga, yeel-a: " b na n yiisa maam laa?" T'a yeele: " n-yee! ned ka wa ne fo sẽn wa ne bũmb nĩngã lae, rẽndame tɩ b maan-a beem, la fo raarã sã n paam mɑɑm, m na sõng-f sõngr tεkẽ).

La Mak pʋgẽ, Alkʋrãanã kell n tonga taab n sigd a zugu, t'a Gibriil sigd ne-a, tɩlgr be a yĩnga, n yi bõn-naands Naab nengẽ, wala a sẽn leb n wat a nengẽ ne tẽn-tʋmdã yel-welsdsã.

La a kellame bala n boond a nebã n tʋgd lɩslaoongã, t'a nebã bas-a la b zab ne-a, la b togs-a kũuni t'a reeg la a bas a Tẽn-tʋmdã, ligdi la naam, t'a tõdg rẽ fãa gilli. B yeel-a lame wala nin-bεdã sẽn da yeel-b tẽn-tʋʋmbã sẽn da reng taoorã: tɩ yaa tɩɩm soaba, yaa zĩri-be-neda, la pas-n-rogl-soaba, lɑ b weoog-a, lɑ b yĩd-a a yĩngẽ wã, la b nams a pʋgdbã, La Tẽn-tʋʋmã kell n ka bake -Wẽnd pʋʋsg la A tɩlgr be a yĩnga- Mak pʋgẽ wã n boond n tʋgd Wẽnde, la a kẽnged Hagiimdã wakato la Laarab-rãmbã raasẽ sẽn yaa sũdumsã, n sedg nebã beenẽ, n wilgd-b lɩslaoongã, la a ka tol n belg ned me ne dũni maa zugẽnd ye, a ka bugs ned me ne sʋʋga. Rẽnd a ra ka tar pãnga, a ra ka yɩ n yaa naaba. La a waa ne gees-n-taare a boolgã sɩngrẽ bala, tɩ b tõog n wa ne yẽ sẽn wa ne bũmb ningã buudu, sẽn yaa Alkʋrãan wagellã, rẽnd a ka bak n geesd a zabd-n-taasã ne yell-kãnga ye, tɩ neb nins sẽn nɑ n kõ sɩd ne-a wã, sẽn yaa Ṣahaab waglsã kõ-ɑ sɩdɑ, Wẽnd yɑrd be b fãa yĩnga. La Mak pʋgẽ wã Wẽnd waoog-a lame ne yel-solemd zɩsgã, yẽ me la ɭsraa'ʋ (Yʋn-kẽnde), n kẽng Bayt Almaƙdas(Fɩlɩstɩɩn), rẽ poorẽ t'a rʋʋg beenẽ n kẽng saasẽ wã, la bũmb ninga sẽn yaa b sẽn mi, yaa tɩ Wẽnd zẽkame n tʋg saasẽ wã nabiyaama a ɭlyaase la ɑ Sɩɩs-tɩ-maage,tɩlgr be b yiibã yĩnga, wala sẽn togse moeembã nengẽ wã la Nasaar-rãmbẽ wã. La Nabiyaamã, Wẽnd pʋʋsg la A tɩlgr be a yĩnga, a reega sɑgl tɩ b pʋʋssã saasẽ wã, yẽ me la Pʋʋsg ninga lɩslaambã sẽn pʋʋsdã noor a nu raar pʋgẽ wã, la Mak -yεsa- lɑ yel-soalem kãseng a to wã me leb n yɩ, yẽ me la kiuugã pãrgre, halɩ tɩ kɩfr-rãmbã yã-a.

La Ƙʋrayš kɩfr-rãmba rɩka sor buud fãa, sẽn na gɩd Nabiyaama, sẽn na yɩl n nams-a la b zãag nebã ne-a la b maan koko kεgεng wʋsgo yεl-soalemã lɑ tagmas-rãmbã baoob pʋgẽ, n kos sõngr ne Yahuud-rãmba, tɩ b kõ bãmba daliil-rãmba sẽn na sõng-ba tɩ b paam n wẽ no-koεεma ne-a la b gɩd nebã n yi-a.

La Ƙʋrayš kɩfr-rãmbã b lɩslaambã namsgã sẽn wa n tongã, Nabiyaamã -Wẽnd pʋʋsg la A tɩlgr be a yĩngɑ- kõ-b la sore tɩ b yiki n kẽng Habaša (Etioopi), lɑ Nabiyaamã, Wẽnd pʋʋsg la A tɩlgr be a yĩnga, yeel-b lame: "ad naab n be beenẽ, n yaa tẽeg tɩrg soaba, b ka wẽgd ned a nengẽ ye" .La a ra yaa naaba, sẽn yaa Nasaar-rãmbã dĩinã nedɑ. Tɩ sul a yiib sẽn yi Sɑhɑɑbsã pʋgẽ na n yik n kẽng Habaša, la boabdbã sẽn wa n ta Habašã wã, b goma ne naabã sẽn yaa a Naǧaašɩ wã, dĩin ninga Nabiyaama a Mʋhammad Wẽnd pʋʋsg la A tɩlgr be a yĩnga, sẽn wa ne dĩin ningã, t'a kõ sɩda la a yeele: "yã wã -m wẽend ne Wẽnde- ne bũmb ninga a Muusa -tɩlgr be a yĩnga- sẽn wa ne wã, b yita tʋk a yembr pʋgẽ. Tɩ Nɑbiyɑɑmɑ nebã sẽn nɑmsd-ɑ wã kell n kiigd a zug, yẽ ne a Ṣahaabsã.

La neb nins sẽn kõ sɩd ne-a hagiimdã zĩisẽ wã, yaa neb sẽn yi Madiinɑ n wa, tɩ bãmb rãmba na n balm-a ne lɩslaoongo la b na n sõng-a lame tɩ b sã n wa bãmb tẽngẽ wã, la b ra boonda beenẽ tɩ (Yaṯrɩb), t'a kõ sor ne neb nins sẽn da kell yẽ Ṣahaabsẽ wã n da be Makã, tɩ b yik kẽng Madiina, tɩ b yik n kẽng beenẽ, tɩ lɩslaoongã sãeeg Madiina, halɩ tɩ zak ka be beenẽ, rẽndame tɩ lɩslaoongã kẽe-a lame.

La Nabiyaamã,Wẽnd pʋʋsg la A tɩlgr be a yĩnga, sẽn maan yʋʋm piig la tãab Mak pʋgẽ, n boond n tʋgd Wẽnd nengẽ, Wẽnd kõ-a la sor t'a yik n kẽng Madiina, t'ɑ nɑ n yik -Wẽnd pʋʋsg la A tɩlgr be a yĩnga- n tʋg be, n kell n tong ne boolã n tʋg Wẽnd nengẽ wã, tɩ lɩslaoongã Šari-rãmba sikrã kell n pʋglg taaba Madiina, yembr yembre, t'a sɩng moasa n tʋmsd a tẽn-tʋmdbã ne sεbã(lεtɑ) n tʋgd buud-rãmbã taoor-rãmbẽ la nanɑmbsã, tɩ b boond-b n tʋgd lɩslaoongã, la sẽn be a sẽn tʋm tɩ kẽng neb nins nengẽ wã, yaa Rom naabã (Yʋʋnɑɑn), la Fʋrs(ɭɩrɑɑn) naabã la Misr (Ezipt) naabã.

La Madiin la yell ning sẽn yaa wĩntoogã sobgrã yɩ-yã, tɩ nebã yεεse, la ra-kãng zemsa Nabiyaama -Wẽnd pʋʋsg la A tɩlgr be a yĩnga- biigã a ɭbraahɩɩm kũumaa, tɩ nebã yeele: "ad wĩndgã sobgame a ɭbraahɩɩm kũumã yĩnga" Tɩ Nabiyaama,-Wẽnd pʋʋsg la A tɩlgr be a yĩnga- yeele: (Ad kiuugã la wĩntoogã, b ka sobgde ned kũum yĩnga, ka ned vɩɩm yĩng me, la ad b yiibã, b yaa yel-soalem sẽn yi Wẽnd yel-soalmã pʋgẽ, tɩ Wẽnd tar b yiibã n bugsd ne A yembsã)Rẽnd Nabiyaamã,-Wẽnd pʋʋsg la A tɩlgr be a yĩnga-, a sã n dag n yɩɩme n yaa zĩri-be-neda, a na n yãgame n bugs nebã tɩ b ra yags-a ye, la a yeel tɩ "ad wĩntoogã, a sobgame mam biigã kũum yĩnga, rẽnd na n yɩ wãn-wãna ne ned ning sẽn yagsda maam?

La Tẽn-tʋʋmã, Wẽnd pʋʋsg la A tɩlgr be a yĩnga- a Soabã nags-a la ne zʋg-wagla, la Wẽnd sɩf-a lame ne A koεεg A sẽn n yeele: (Lɑ ɑd fo bee zʋg-wagall zugu) [Sʋʋrat Alƙalamu: 4], Rẽnd a yɩɩme tɩ b sɩfd-ɑ ne zʋg-sõng fãa, wala sɩda, la pʋ-peelem, la raoodo, la tẽeg tɩrga, la alkaool pidsgu halɩ n tɩ tãag ne a zabd-n-taas fãa, la kũuni, la ɑ noɑng doos maanego ne tals la nimbãan-neba, la pʋg-kõpa la tʋlsem-rãmba. N leb n tar noang kεgεng ne a na kãndag-ba, n maand yolsg ne-ba, n gãnegd a meng ne-ba, halɩ tɩ ned sẽn yaa sãana, a watame n bɑood Tẽn-tʋʋmã -Wẽnd pʋʋsg la A tɩlgr be a yĩnga- n sokd a Ṣahaabsã -Wẽnd yard be b yĩnga- ɑ yelle, n mik a be b sʋkã t'a ka mi-a ye, n yetẽ: " yaa ãnda la a Mʋhammad yãmb sʋkã?"

La a Sɩɩrã wã (vɩɩmã kibayã) yaa yel-soɑlem tεkẽ ɑ sẽn pid keelem, la tɩrlem a tʋmd-n-taarã pʋgẽ ne nebã fãa gilli: à bε la a zao, sẽn pẽ-a la sẽn zãra, lɑ kãsem la biigɑ, lɑ rao la paga, we-rũmsã la bõn-yɩgdɩ wã.

La wakat ning Wẽnd sẽn wa n pids dĩinã n kõ-a wã, tɩ Tẽn-tʋʋmã -Wẽnd pʋʋsg la A tɩlgr be a yĩnga- sẽn wɑ n taas a tẽn-tʋmdã taasg tεkẽ, a maana kaalem ta yʋʋmã yaa yʋʋm 63 (pis-yoob la a tãabo), yʋʋm 40 (pis naas) n be a pʋgẽ taoor t'a na n ka yɩ Nabiyaam ye, tɩ yʋʋm 23 (pisi la a tãabã) t'a yaa Nabiyaamɑ n yaa Tẽn-tʋʋma. La b mum-a la Madiina-Wẽnd pʋʋsg la A tɩlgr be a yĩnga- a ka bas arzεka, a ka bas faado, sã n ka ɑ boang-wεεgã sẽn yɑɑ pεεlgã, ɑ sẽn dɑ zɑo ɑ soɑbã, la pʋʋg a sẽn maan tɩ yaa doɑɑgɑ kẽn-kẽndbã yĩnga.

La neb nins sẽn da sak n na n tũ dĩinã la b kõ sɩd ne-a la b pʋg-a wã, b sõorã rag n yaa wʋsgo, la tũu-a lame n kẽng hagiimdẽ wã, sẽn yɑɑ a Ṣahaabsã sãndɑ Wẽnd nɑ wat ne hagiimdẽ wã, sẽn yɩɩd neb 100 000 (tus koabga) la rẽnda yɩɩ taoor t'a na ka maan kaalem kiiug a tãabo, rẽnd tõoeme tɩ yaa woto la a dĩinã gũubã la ɑ sãaegrã sabab-rãmb sãnda. La ɑ Ṣahaabs nins a sẽn da wʋb-b rãmb ne lɩslaoongã zʋgdã lɑ ɑ nɑ-kẽndrã, n yaa Ṣahaabse (tũud-n-taas) sẽn yɩɩd sõmblem, tɩrlem, la dũni yĩgsgẽ la nedemdo la alkaool pidsgu, la kũun lɑ nidig-pãngɑ dĩin-kãngã poorẽ sẽn yaa dĩin zɩsgã, b sẽn kõ sɩd ne-ɑ wã.

La a Ṣahaabsã, sẽn wa n tʋg n yɩɩd bedrem -Wẽnd yard be b fãa yĩnga- ne liimaoongo la bãngre la tʋʋma, la pʋ-peelem, la sɩdgre, la kũuni la raoodo, yaa a Abuu Bakr Aṣṣɩdiiƙ (sẽn yaa sɩd-kõtã), la a ʿƲmar ɭbn Al-ẖaṭṭaab la a ʿƲṯmaan ɭbn ʿAffaan, la a ʿAli ɭbn Abɩṭaalib, Wẽnd yard be b yĩngã, la bãmb bee neb nins rẽenem sẽn kõ-b sɩd ne-a la b sɩdg-a wã, la yɩɩ bãmb me la lεdsba Nabiyaamã poorẽ, neb nins sẽn zẽk lɩslaoongã Lεεma a loogrã poorẽ, b ra ka tar baa fʋɩ sẽn yaa Nabiyaamdlmã yεl ye, a leb n ka welg-b ne bũmb n kõ-ba tɩ pɑ tũ ne Ṣahaabs nins sẽn kellã fãa ye, Wẽnd yard be b yĩnga.

La Wẽnd gũu a Gaf ning A sẽn sik n kõ-a wã, la a sunnah, la a Sɩɩrã wã (vɩɩmã kʋdemde) la a koeesã, la a tʋʋmã ne a buudɑ gomd ningɑ a sẽn gom ne wã, la b ka gũ ned Sɩɩra (vɩɩm yelle) -dũni wã sɩngr tεkẽ- wala b sẽn gũus ɑ vɩɩmã yellã -Wẽnd pʋʋsg la A tɩlgr be a yĩnga- b pʋs n gũus ɑ sẽn gõe to-to la ɑ sẽn rɩte la a sẽn laade. La ɑ sẽn dɑ tʋmd ne a zakã-rãmb to-to a zakã pʋgẽ? La a yεlã fãɑ yɑɑ bũmb b sẽn gũusi, n kʋls-ɑ a sɩɩrã wã (vɩɩmã yεl) pʋgẽ, rẽnd a yaa yĩng soaba, n yaa Tẽn-tʋʋma, a ka tar Rʋbʋʋbɩya (Sobendmã) yell baa kɩdg ye, a ka so a meng yĩng nafa maa namsg ye.

4- A Tẽn-tʋmdã

Wẽnd tʋmsa a Mʋhammad Wẽnd pʋʋsg la A tɩlgr be a yĩnga, lagem-n-taarã la kɩfẽndã la zɩɩlmã sẽn wa n gũbg dũni wã ween-vɩɩsã fãa, tɩ tẽngã poor zugu, ned ra ka be beenẽ, n tũud Wẽnde, n ka maan lagem-n-taar ne-A ye, sã n ka bilf bala sẽn yɑɑ neb saare, sẽn yi Gafa taabã rãmbẽ, tɩ Wẽd tʋms a Tẽn-tʋʋmã ɑ Mʋhɑmmɑd -Wẽnd pʋʋsg la A tɩlgr be a yĩnga- t'a yaa Pidsda ne nabiyaam-rãmbã la tẽn-tʋʋmbã, Wẽnd tʋms-a lame ne kãndagre la dĩin sẽn yaa sɩda, bõn-naandsã fãa gill yĩnga, bʋl yĩng t'a na wa n wil dĩin-rãmbã fãa gilli, la a na yiis nebã lagem-n-taarã la kɩfẽndã la zɩɩlmã ligsẽ n tʋg Wẽnd yembgã la sɩd-kũunã vẽenemẽ. La a tẽn-tʋmdã yaa sẽn pids tẽn-tʋʋm-rãmb nins sẽn reng taoorã pʋʋsg la tɩlgr be b yĩnga.

La a boolame n tʋg bũmb ning fãa nabiyaam-rãmbã la tẽn-tʋʋmbã sẽn bool n tʋgã tɩlgr be b yĩnga: A Nuuh la a ɭbraahɩɩm la a Muusɑ lɑ ɑ Sʋlaymaan la a Daawʋʋd la a ɭɩsa- sẽn yaa sɩd-kũuni tɩ Soɑbã Yẽ la wẽnde sẽn ya a Naandã, n ya a Rɩlgdã, n ya a Vʋʋgdã, sẽn ya a Kʋʋdã, n ya a Naam Soadã, la Yẽnda la sẽn kẽnsd yεlã, la Yẽnda la ɑ nimbãan-zoεta, n ya a Yoalsda, la Wẽnde, Yẽ la Nannda bũmb ning sẽn be ween-n-vʋɩɩgã fãa gill pʋgẽ wã, tõnd sẽn ne la d sẽn ka ne wã, La zẽng sẽn ka Wẽnd fãa yẽ yaa bõn-naandga sẽn yi A bõn-naandsẽ wã.

Wala a sẽn boole n tʋg Wẽnd tũudum a Yembr tãa, la b bas zẽng sẽn ka Yẽnda tũudum, la a vẽneg vẽnegr tεkẽ tɩ ad Wẽnd yaa A Yembre, lagem-n-taar ka be ne-A ye, A tũudmã pʋgẽ, la A Naamã pʋgẽ, la A Naanegã pʋgẽ la A kẽnesgã pʋgẽ. La ɑ vẽnegdẽ -vẽnegr tεkẽ tɩ ad Wẽnd yɑɑ yembre lɑgm-n-tɑɑr kɑ be ne-A A tũudumã pʋgẽ mɑɑ A nɑɑmɑ pʋgẽ mɑɑ A nɑɑngã mɑɑ A rɑbgã, lɑ ɑ vẽne g tɩ Wẽnde -A Naam yɩlgame- A ka roge b ka rog-A , A ka tar mak-n-taaga A ka tar bilig-n-taaga, laɑ A ka sigid baa fʋɩ pʋgẽ A bõn-naandsẽ wã A leb n pɑ rɩkd ɑ yĩngã n lebg-ɑ ye.

Lɑ ɑ boolame n tʋg sɩd-kũuni ne Gaf-rãmb nins sẽn yaa Wẽnd Gaf-rãmbã sẽn reng taoore, wala a ɭbraahɩɩm la a Muusa Gaf-rãmba, pʋʋsg la tɩlgr be b yiibã yĩnga, la Taooraatã la Zabʋʋrã la Lingiiliã. Wala a sẽn boole n tʋg sɩd-kũuni ne tẽn-tʋʋmbã fãa gilli, tɩlgr be b yĩnga, la a wĩnig tɩ ned ning sẽn yags nabiyaam a yembre, a kɩfla ne nabiyaam-rãmbã fãa gilli.

La a kõ nebã fãɑ gill kibɑ-noogo ne Wẽnd Yolsgã, lɑ Wẽnd n na n sek-ba dũni kaanẽ, la ad Wẽnde, Yẽnda la Naabã n ya a Yolsda, la Yẽnda A Yembr tãa n na n geel bõn-naandsã Yikrɑ raarã A sẽn wat n vʋʋg-ba b kũumã poorẽ n yi b yaadẽ wã, la ad yaa Yẽnda me n na n rol sɩd-kõtbã b tʋʋm sõmã wã wala b sẽn tʋmã buud bilgr piigɑ, la tʋʋm wẽng (rolb) yaa wala tʋʋm wẽngã buud bala. B leb n tara vɩ-noogo sẽn duumdi Yaoolem raarã. La ned ning sẽn kɩfla la a tʋm tʋʋm wẽnse, a na n paama a rolb dũni kaanẽ la yaollem raarã.

La Tẽn-tʋʋm a Mʋhammad -Wẽnd pʋʋsg la A tɩlgr be a yĩnga- a tẽn-tʋmdã pʋgẽ a ka waoog a buudã ɑ ka wɑoog a tẽngã ka a mengã sẽn yaa zɩsgã, pʋs n waa Alkʋrãan wɑgellã pʋgẽ nabiyaam-rãmbã yʋɩ, a Nuuhu la ɑ ɭbraahɩɩm la a Muusa la a ɭɩsa, tɩlgr be b yĩnga, n yɩɩd Nabiyaamã yʋʋrã sẽn wɑ wã , la b ka togs a ma wã yʋʋre ka a pagbã yʋɩ me Alkʋrãan wagellã pʋgẽ ye. La waa Alkʋrãanã pʋgẽ, a Muusa ma wã yell togsgo sẽn pɑ vugri, la a Maryam -tɩlgr be ɑ yĩngɑ- ɑ yʋʋrã pʋdɑ ɑ pʋgẽ noor 35 (pis-tã la a nu).

La Tẽn-tʋʋm a Mʋhammad -Wẽnd pʋʋsg la A tɩlgr be a yĩnga- b gũu-a lame n yi ne bũmb fãɑ gill sẽn yõsgd Šari wã la yam la Fɩṭra (rog-ne wã) maa zʋg sõng sẽn ka sakd bũmb ningã, bala nabiyaam-rãmba,pʋʋsg la tɩlgr be b yĩnga, b gũb lame n yi yõsgre bũmb ning b sẽn taasde sẽn yi Wẽnd nengẽ wã, la yaa bãmb me la b sẽn rogl-b rãmb tɩ b taas Wẽnd saglsã A yembsẽ wã. La nabiyaam-rãmbã b ka tar bũmb sẽn welg ne bãmbɑ sẽn yaa Rʋbʋʋbɩya (Sobendem) yell ye, bɩ Ʋlʋʋhɩya (Sobend tũuds) ye. Pʋs n ka woto ye, bãmb me yaa yĩns rãmba wala neb a taabã, tɩ Wẽnde -Anɑɑm zẽkyã- tʋmd A tẽn-tʋma tɩ kẽngd b nengẽ.

La kaset-rãmb sẽn tʋg n be beenẽ n yɩɩda, n wĩngd tɩ Tẽn-tʋʋm a Mʋhammad-Wẽnd pʋʋsg la A tɩlgr be a yĩnga- Tẽn-tʋmdã yaa sẽn tʋm tɩ yi Wẽnd nengẽ wã, yaa sẽn mik tɩ halɩ n tɩ tãag rũndã a beeme, wala a sẽn dag n yaa a soaba Nabiyaamã vɩɩmã wakatã, tɩ neb tũud-a sẽn yɩɩd lɩslaam Milyɑɑre(1 000 000 000), b maanda a waagib-rãmbã sẽn yɑɑ Šari wã, wala Pʋʋsgã ,la Zakã, la no-loeerã la Higiimdã, la zẽng sẽn ka rẽnda, tɩ ka tũ ne toeengo mɑɑ golengo.

5- A Nabiyaamdmã tagmas-rãmbã la a daliil-rãmba

Wẽnd kengda A Nabiyaam-rãmba ne yel-soalm sẽn wiligd tɩ b yaa nabiyaam-rãmba, la A leb n kõt-b tõogre la gom-n-lub sẽn wilgd b tẽn-tʋʋmdmã, la ad Wẽnd kõo nabiyaam fãa sẽn yaa yel-soalmã, bũmb ning sẽn sekd tɩ ninsaalbã kõ sɩda ne a buudã, la yel-soalem-rãmb nins b sẽn kõ nɑbiyɑɑm-dãmbã sẽn tʋg n yaa zɩsg n yɩɩdɑ yaa tõnd Nabiyaama a Mʋhammad yel-soalem-rãmbã Wẽnd pʋʋsg la A tɩlgr be a yĩnga, bala Wẽnd kõo-a la Alkʋrãan wagellã, yẽ me la yel-solemde sẽn kelle tẽn-tʋʋmbã yel-soalem-rãmbẽ wã n na n tʋg n tãa dũni wã yikr rɑɑre. Wala Wẽnd sẽn keng-a ne yel-soalem-rãmbã sẽn yaa bεdã, la Tẽn-tʋʋma a Mʋhammad -Wẽnd pʋʋsg la A tɩlgr be a yĩnga- yel-soalem-rãmbã yaa wʋsgo, sẽn be b pʋgẽ:

yaa ɭsraa'ʋ la Mɩ'ʿraaǧ (Yʋn-kẽndã la Yʋn-dʋʋrã), la kiuugã pãrgr, la sa-koomã kiigri noor wʋsgo a sẽn kos a Soabã poorẽ t'A yũnug nebã war sẽn paam-b poorẽ.

La rɩɩb mɑɑn tɩ lebg wʋsgo, la koom sẽn yɑɑ kɩdg wʋsgre, tɩ neb sẽn yaa wʋsg rɩ-a maa b yũ-a.

La a sẽn kõt kibay ne yel-soondɩ sẽn loogã ned baa a yembr ka bãng a sẽn yɩ to-to ye, lɑ yɑɑ Wẽnd n togs-a, wala nabiyaam-rãmbã kibayã -tɩlgr be b yĩnga- bãmb ne b nebã yelle, la vadgã rãmb kibarã.

La a sẽn kõt kibay ne yel-soaandɩ sẽn wate, tɩ sɩd yɩ rẽ loogr poorẽ, ne Wẽnd sẽn dag n kõ-a kibar A Naam yɩlɩgame, wala bugum ning kibar sẽn yit Hiǧaaz tẽngã wεεngẽ, tɩ neb nins sẽn be Šaam yã-a. La nebã sẽn na n wa met meoongã n tomdã.

La Wẽnd sẽn sek-a la A gũ-a n yi nebã.

La ɑ sẽn pʋlem ɑ Ṣahaabsã tɩ yɩ wã, wala a sẽn yeel-ba: (Ad yãmba nɑ n pɑkɑ Faarɩs la Rʋʋm, la ad yãmb n na n rɩk b arzεgsã n kẽes wẽnd Sorã pʋga)

La Wẽnd sẽn leb n sõng-a ne malεgsã.

La nabiyaam-rãmba,pʋʋsg la tɩlgr be b yĩnga, sẽn kõ b nebã kiba-noodo ne Tẽn-tʋʋmã a Mʋhammad nabiyaamdemã -Wẽnd pʋʋsg la A tɩlgr be a yĩnga- la sẽn be sẽn kõ-b sũ-noogr ne-a wɑɑngã, ya a Muusa, la a Daawʋʋda, la a Sʋlaymaane, la a ɭɩsa, tɩlgr be b yĩnga, la zẽng sẽn ka bãmba sẽn yi ɭsraεεl koambã nabiyaam-rãmbẽ wã.

La sẽn lagem ne tagmas-rãmb yam pʋgẽ la bilg-rãmb (5) nins sẽn togsde tɩ yam sõng sakd n reeg-ɑ wã.

La Aayae-bãmbã, ne daliil-dãmbã, la bilgr-rãmb nins sẽn yaa yam-mɑkr wεεngẽ wã, b yaa bũmb sẽn sãeeg n yɑdg Alkʋrãan wagellã la Nabiyaamã Sunnah pʋga, la ɑ tagmas-rãmbã waoogame n yɩɩd geelgo, ned ning sẽn rat n na n yals a zugu, bɩ a ges Alkʋrãan wagellã la Nabiyaamã Sunnah gaf-rãmbẽ, la Nabiyaamã Sɩɩrã wã (vɩɩmã kibay) rẽnd kibar vẽeneg be b pʋgẽ sẽn kẽed ne tagmas-kãensã.

La tagmas-kãensã sẽn yaa bεd-bεdã sã n rag n ka yɩẽ, a zabd-n-taasã sẽn yaa Ƙʋrayš kɩfr-rãmbã la Yahʋʋd-rãmba la Nasaar-rãmba, sẽn rag n be Laarab-rãmbã zamaanẽ wã, b rag n na paam sẽka n yags-a la b bugs nebã n yɩ-a.

La Alkʋrãan wagellã, yẽnda la gaf ning Wẽnd sẽn tʋms tɩ tʋg A Tẽn-tʋʋma a Mʋhammad nengẽ wã -Wẽnd pʋʋsg la A tɩlgr be a yĩnga- yẽndã me yaa bõn-naands Naabã Goamã, la Wẽnd geesa ninsaalbã la zĩn-dãmba tɩ b wa ne a bilg-n-taare, maa sʋʋra ɑ yembre sẽn wõnd wɑ a Sʋʋr-rãmbã a yembre, la geesgã ka bak n beẽ n tɩ tãag rũnda, lɑ ka tõe ye. la Alkʋrãan wagellã, a leokda sogsg wʋsgo sẽn yirbd neb tus kẽema wʋsgo. La Alkʋrãan zɩsgã yaa bũmb b sẽn gũ n tɩ tãag rũndã ne Laarabiimd ningã a sẽn sig ne wã, baa gom-bil a yembr ka boog a pʋgẽ ye, yaa bũmb me sẽn wẽ n yiisi (ẽmprime) tɩ b sãeeg-ɑ, a yaa gaf sẽn yaa zɩsgo n komsd ɑ geesdbã, yẽ me la gaf sẽn yɩɩd zɩslem sẽn wa nebã nengẽ, tɩ sõmb tɩ b karem-a maa b karem a maanã wã sẽn lebg ne bu-zẽmsã goamã. La ned ning a lak-n-ges la a sɩd-kũun sẽn põsg a soaba, ad sõma gill põsg yẽnda, Wala Tẽn-tʋʋma a Mʋhammad Sunnah -Wẽnd pʋʋsg la A tɩlgr be a yĩnga- la a na-kẽndrã la a Sɩɩrã wã (a vɩɩmã kibay), yaa bũmb sẽn gũusi, n rɩk tɩ lolme, n tũ ne togsdb b sẽn tar bas-m-yam ne b rãmba, yẽ me yaa bũmb sẽn ẽmprime (wẽ n yiisi) ne Laarabiimd ninga Tẽn-tʋʋm a Mʋhammad -Wẽnd pʋʋsg la A tɩlgr be a yĩnga- sẽn gom ne-ɑ wã tɩ yaa wala a ket n vɩɩ tõnd sʋka. A yaa bũmb me sẽn lebg n tʋg buud gom-rãmb wʋsgo, la Alkʋrãan wagellã ne Nabiyaamã Sunnah -Wẽnd pʋʋsg la A tɩlgr be a yĩnga- bãmbã b yiibã la yẽgr ɑ yembr tãa b sẽn yãkd lɩslaoongã bʋʋdo la a Šari-rãmbã a pʋgẽ.

6- Šari ningɑ Tẽn-tʋʋmã a Mʋhammad sẽn wa ne-ɑ wã, Wẽnd pʋʋsg la A tɩlgr be a yĩnga-

Šari ning Tẽn-tʋʋmã a Mʋhammad sẽn wa ne-ɑ wã -Wẽnd pʋʋsg la A tɩlgr be a yĩnga- yẽ la lɩslaoongã Šari, yaa yẽndã me n pids Wẽnd Šari-rãmbã la Wẽnd tẽn-tʋmã, lɑ yẽ me sã n yaa ɑ yẽgẽ wã, a wõnda wala nabiyaam-rãmb nins sẽn reng taoorã Šari-rãmbã, baa tɩ b yalẽ wã sã n yõsa taaba.

Yẽ me lɑ Šari pitgã, a yaa bũmb sẽn sakd zamaan la zĩig fãa pʋgẽ, nebã dĩinã la dũni manegr be a pʋgẽ, yẽ me yaa bũmb sẽn kʋmb tũudmã fãa gill sẽn yaa tɩlae n rog yembsã tɩ b mɑɑn-ɑ Wẽnd yĩngɑ sẽn yaa bõn-naands Naandã, wala Pʋʋsgo la Zaka, a leb n vẽnegdẽ n wiligdɑ bãmba tʋmd-n-taarã arzεk wεεngẽ la bɑoobã lɑ nebã vʋɩsm-n-tɑɑrã, la Tẽms zãab (politikã) yεla la zabɑ la ween-n-vɩɩga koglg yεla, sẽn sakd a pʋgẽ la sẽn ka sakde, la zẽng sẽn ka rẽnda sẽn yaa bũmb ning nebã vɩɩmã sẽn tar tʋlsem ne-a la b yaoolem raarã.

La ŠaRi-kãngã gũudɑ nebã dĩinɑ la b zɩɩmã la b burkĩndã la b arzεgsã la b yamã la b koambã, a yaa bũmb sẽn tigim zʋg-sõmse la manegr buud fãa, la a bugsd n yit tʋʋm beed fãa la maan wẽng fãa, a boondame n tʋgd ninsaal waoogre, la tẽng-n-sʋgre la tẽeg tɩrga la pʋ-peelem la yɩlgre la maan-tɩ-yɩ-sõma la noanglem, la rat-neer ne nebã la b zɩɩmã gũusgu la tẽmsã laafɩ, la a leb n gɩdgd nebã pelmes yɩkre tɩ ka tũ ne hakε ye. La Tẽn-tʋʋmã ɑ Mʋhɑmmɑd -Wẽnd pʋʋsg la A tɩlgr be a yĩnga- a rag n yɩɩme n zabd ne kedgrã la sãangã ɑ yalẽ la ɑ kõbgã fãa, la ɑ zabd ne zĩri-beedã la nebã zãɑgrã la Lɑbiimdu (welg-n-bas dũni n teeg tũudum bala).

La Tẽn-tʋʋmã a Mʋhammad -Wẽnd pʋʋsg la A tɩlgr be a yĩnga- a vẽnegame n wĩnig tɩ Wẽnd waooga ninsaala, rapa la pagba, la A gũus a hakε-rãmbã fãa gill n kõ-ba, la A maan-a tɩ yẽndã n tʋkd ɑ yam yãkrã yele la a tʋʋmã la a manesmã fãa, la A leb n rogl-a yẽ sẽn tʋm tʋʋm buud fãa gilli sẽn namsd a menga maa namsd neb a taabã, yaa yẽ la b sokda, la A maan paga la rao tɩ yaa yembre, sã n yaa sɩd-kũunã wεεngẽ la reeg-m-zugẽ wã wεεngẽ la rolbã lɑ yel-sõmdã wεεngẽ. La bee Šari-kãngã pʋgẽ ning-m-toaag sẽn welg zalle ne paga, zem t'a yaa ma mɑɑ paga mɑɑ a yɑɑ bi-pugla mɑɑ tão-poaka.

La Šari ningɑ Tẽn-tʋʋmã a Mʋhammad sẽn wɑ ne-ɑ wã -Wẽnd pʋʋsg la A tɩlgr be a yĩnga- a waame n na n gũ yamã, la a gɩdg bũmb fãa sẽn sãamd-a, wala rãam yũubu, rẽnd lɩslaamdã a maaname tɩ dĩinã yaa vẽenem n toond yamã t'a rɩk a sorã, bʋɩl yĩng tɩ ninsaal na tũ a Soabã ne pʋ-tẽer la bãngre, la lɩslaoongã Šari wã zẽka yamã yelle la a maan-a tɩ yaa yẽnda la tʋʋmã roglg tεεga, la ɑ loɑdg-a n yi zĩri-beed la rog-m-mikã bãense lɑ rʋbsɑ yεlɑ.

La lɩslaoongã Šari wã a zɩsgda bãng-sõngo, la a leb n pirsd bãngr pẽes bɑo n bãng, sẽn pidg n zãag ne yõor yamleoogo, la a boond n tʋg tɩ b tɑgs n ges yõorã la ween-vɩʋʋga wεεngẽ, la bũmb ninga b sẽn yiisd bãngr pẽes n bɑo n bãngã pʋgẽ wã ɑ sã n yɩ sõmɑ ɑ pɑ kɩɩsd bũmb ning Tẽn-tʋʋma-Wẽnd pʋʋsg la A tɩlgr be a yĩnga- sẽn wa ne wã ye.

La pɑ be Šari wã pʋgẽ, welg n yiis kõbgo nebã pʋgẽ tɩ yaa yẽ n yɩɩd tɩ ka tũ ne gõbg a taabɑ ye. Yɩɩdlem leb n ka be beenẽ ne neb a taaba nin-zẽms zug ye. B fãa gilli a bʋʋdã pʋgẽ b yaa yembre, bala nebã fãa gilli b yẽgrẽ wã yaa yembre, yɩɩdlem ka be ne kõbgo kõbg a to zugu leb n ka be ne neba neb a taabã zugu rẽnda ne Wẽnd zoεεg bala. La Tẽn-tʋʋma a Mʋhammad -Wẽnd pʋʋsg la A tɩlgr be a yĩnga- kõo kibare tɩ ned sẽn rog fãa a rogda Fɩṭrã (Wẽnd naanegã) zugu, ned ka be ninsaalbã pʋgẽ n rogdẽ t'a yaa tudgd ye, maa a rɩk nin-zẽng tudgr faad ye.

Lɩslaoongã Šari pʋgẽ Wẽnd maana tuubgu, yẽnda me la: ninsaal lebs a meng Wẽnd nengẽ la a bas zunuubã, la lɩslaoongã a wurda bũmb ning sẽn renga taoorã sẽn yaa zunuubã, la tuubgã a sũkda bũmb ning sẽn reng ɑ taoorã sẽn yaa zunuubã fãa, rẽnd tʋlsem ka be tɩ f maan reeg-m-zugẽ n nɑ n togs f zunuub-rãmbã bõn-naandsã taoor ye. Rẽnd lɩslaoongã pʋgẽ tõk-n-taare yɩtame ninsaalã ne Wẽnd sʋka tɩrga, rẽnd a ka tar tʋlsem n tʋg neda t'a yɩ tẽng-n-sʋgre foom ne Wẽnd sʋk ye, rẽnd lɩslaoongã gɩdgdame tɩ b wa maan neba tɩ b yaa wẽnd-dãmba maa lagem-n-taase ne Wẽnd ye, zem tɩ yɑɑ A Wẽndlmẽ wã mɑɑ A Soɑbendẽ wã.

La Šari ninga Tẽn-tʋʋmã a Mʋhammad -Wẽnd pʋʋsg la A tɩlgr be a yĩnga- sẽn wa ne wã, a yẽesda Šari-rãmb nins sẽn reng taoorã, bala lɩslaoongã Šari ning Tẽn-tʋʋmã a Mʋhamaad Wẽnd pʋʋsg la A tɩlgr be a yĩnga, sẽn wa ne tɩ yi Wẽnd nengẽ wã, yẽnda la Šari-rãmbã fãa baasdga, n na n tʋg n tãag dũni wã yikr rɑɑre, ɑ yaa bõn-naandsã fãa gill yĩnga, rẽ n kɩt t'a yẽes Šari-rãmba sẽn reng taoorã, wala Šari-rãmb nins sẽn reng taoorã me sẽn yẽes taabã. La Wẽnde A Naam yɩlgame n zẽke, A ka reegd Šari zẽng tɩ ka lɩslaoongã Šari ye, A ka reegd dĩin me tɩ sã n ka lɩslaoongã dĩin ye, Tẽn-tʋʋma a Mʋhammad -Wẽnd pʋʋsg la A tɩlgr be a yĩnga- sẽn wa n-ɑ soɑbã. La ned ning sẽn wa n tʋg kẽ dĩin zẽng tɩ ka lɩslaoongã b ka na n tol n reeg a yĩng lae-lae ye. La ned ning sẽn rat n bãng Šari-kãngã bʋʋdã sẽn welse, bɩ a bao n bãng gaf-rãmb nins pʋsẽ b sẽn tar bas-m-yam ne-ɑ wã, gɑf-rãmb nins sẽn wiligd lɩslaoongã sẽn yaa a soabã.

Ad lɩslaoongã Šari wã raabã -sẽn yaa wala Wẽnd tẽn-tʋmã fãa raabã- yaa tɩ dĩin sɩdã zẽnk ninsaala, tɩ ɑ yɩ yamba sẽn welg toor ne wẽnd sẽn yaa bãn-naandsã Naabã, la a bɑɑ-gɑ n yi ninsaalbã maa ãndũni wã maa yel-yaals yembdo.

Ad lɩslaoongã Šari wã, a yaa bũmb sẽn manege zamaan fãɑ la zĩig fãa pʋgẽ, la ka be a pʋgẽ bũmb sẽn põnd ne ninsaal raab nins sẽn manega ye. bala a yaa bũmb sẽn siki n yi Wẽnd nengẽ, sẽn mi bũmb ninga nebã sẽn tar tʋslem ne-a wã. La nebã tara tʋlsem n tʋg Šari sẽn yaa sõma a toore, sẽn ka yidgd taab ye, sẽn manegd ninsaalba, tɩ pɑ ned baa a yembre n yẽmbg-ɑ ye, lɑ a yɩtame n yaa b sẽn deege n yi Wẽnd nengẽ, t'ɑ peegd nebã n tʋgd sõma la kãndagr sore. Rẽnd b sã n tall-a n bʋ b yεla mɑnegdɑ me la b paam tɩlgre n yi bãmb ne taab wẽgdã.

A zabd-n-taasã yãnesg zĩiga la b kaset-rãmba mɑɑnego ne-a

Sik ka be tɩ Nabiyaam fãa tara ɑ zabd-n-taase, tɩ b maand-a beem la b yãs a boolgã sor zugu, n gɩt nebã tɩ b ra kõ sɩd ne-a ye. La Wẽnd Tẽn-tʋʋmã ɑ Mʋhɑmɑd -Wẽnd pʋʋsg la A tɩlgr be a yĩnga- a rag n tara zabd-n-taas wʋsgo, a vɩɩmã wɑkɑt la a kũumã poorẽ, la ad Wẽnd sõng-a lame t'a tõog-b fãa gilli. La kɑset-rãmb pʋgla taabɑ sẽn yi b wʋsgã fãɑ nengẽ - kʋdgo lɑ pɑɑlm-pɑɑlem- t'a yaa Nabiyaamɑ, la ad a waa ne wala bũmb ninga nabiyaam-rãmb nins sẽn reng taoorã sẽn wa ne wã, pʋʋsg la tɩlgr be b yĩnga, la ad bãmb miime t'a bee sɩd zugu, la ad yel gɩdigs wʋsgo n gɩdigd-b wʋsgã fãɑ tɩ b ka kõt sɩd ne-a ye, wala zugundã noanglem maa nebã zoeese, maa yaa ligd ning a sẽn paamde a naamã poorẽ wã kongr rɑbeem.

La Pẽgr tigingu be ne Wẽnde sẽn yɑɑ bõn-naandsã Nɑɑbã

Yaa karen-saam bedrã a Mʋhammad ɭbn Abdʋllaah Assʋhaim n gʋls-a

Yɑɑ Loεεgã bãngr karen-saambɑ lɩslaoongã kareng bukgẽ wã ( gʋdgo)

wʋbrã kɑreng rooge (fɑkilte) sẽn be naabã a Sʋ'ʿʋʋd karen-do kẽengẽ wã (Inɩversɩte).

Rɩyaade, Arabɩ Saoodɩt tẽngẽ wã

Lɩslaoongã Tẽn-tʋʋmã a Mʋhammad, -Wẽnd pʋʋsg la A tɩlgr be a yĩnga

1- A yʋʋrã, la a buudã, la tẽng ningɑ a sẽn roge la a bɩ a pʋgẽ wã.

2-Albark furã loese ne albark pagã

Wahɩ wã (tʋmsgã) sɩngre

4- A Tẽn-tʋmdã

5- A Nabiyaamdmã tagmas-rãmbã la a daliil-rãmba

6- Šari ningɑ Tẽn-tʋʋmã a Mʋhammad sẽn wa ne-ɑ wã, Wẽnd pʋʋsg la A tɩlgr be a yĩnga-